ایوانِ صدر میں منعقدہ ایک خصوصی تقریب میں آصفہ بھٹو زرداری نے چینی میڈیکل ٹیم سے ملاقات کی، جنہوں نے پاکستان کے مختلف شہروں میں سینکڑوں دل کے مریض بچوں کا مفت علاج کیا اور متعدد بچوں کی زندگی کو نئی امید دی۔ خاتونِ اوّل نے کہا کہ "چینی ڈاکٹروں کی یہ خدمات نہ صرف طبی شعبے میں شراکت داری کی مثال ہیں بلکہ دونوں ممالک کے عوام کے درمیان گہرے انسانی تعلقات کی عکاسی بھی کرتی ہیں۔"
انہوں نے کہا کہ پاکستان اور چین کی دوستی صرف حکومتی سطح تک محدود نہیں بلکہ عوامی سطح پر بھی یہ رشتہ مزید مضبوط ہو رہا ہے۔ "بچوں کی زندگی بچانے کے لیے آپ کی ہمدردی اور پیشہ ورانہ مہارت پاکستان کی عوام کے دلوں میں ہمیشہ یاد رکھی جائے گی،" آصفہ بھٹو زرداری نے اپنے خطاب میں کہا۔
چینی میڈیکل ٹیم نے بھی پاکستانی عوام کی مہمان نوازی اور تعاون پر شکریہ ادا کرتے ہوئے کہا کہ وہ مستقبل میں بھی پاکستان میں طبی خدمات فراہم کرنے کے عزم کو جاری رکھیں گے۔
واضح رہے کہ چین کی میڈیکل ٹیم پچھلے چند برسوں سے پاکستان میں دل کے عارضے میں مبتلا بچوں کے مفت علاج کے لیے کام کر رہی ہے، جس سے اب تک درجنوں خاندانوں کو نئی زندگی اور امید ملی ہے۔