شادی کی خواہش ختم، مگر باپ بننے کی آرزو باقی ہے – سلمان خان کا حیران کن انکشاف

 ممبئی: بالی ووڈ کے معروف اداکار سلمان خان نے ایک تازہ انٹرویو میں اپنی ذاتی زندگی سے متعلق ایسا انکشاف کر دیا جو مداحوں کے لیے حیران کن ثابت ہوا۔

سلمان خان، جن سے ہر انٹرویو میں شادی کے متعلق سوال کیا جاتا ہے، ہمیشہ خاموشی اختیار کرتے آئے ہیں، لیکن اس بار انہوں نے کھل کر بات کی۔ اداکار نے واضح الفاظ میں کہا کہ اب وہ شادی کرنے کی تمنا نہیں رکھتے۔

انہوں نے مزید کہا کہ اگرچہ وہ شادی کے بارے میں سنجیدہ نہیں ہیں، مگر باپ بننے کے خیال کو انتہائی سنجیدگی سے دیکھ رہے ہیں۔ دبنگ خان کا کہنا تھا کہ زندگی کے اس مرحلے پر وہ والد بننے کی خواہش رکھتے ہیں اور اس بارے میں مختلف امکانات پر غور بھی کر رہے ہیں۔

شادی نہ ہونے کی وجہ پر بات کرتے ہوئے سلمان خان نے ہلکے پھلکے انداز میں کہا کہ ’’اگر اس معاملے میں کسی کو الزام دینا ہے تو وہ میں خود ہوں‘‘۔ انہوں نے اشارہ دیا کہ ان کی زندگی کا انداز اور مصروفیات اس فیصلے میں اہم کردار ادا کرتے ہیں۔

یاد رہے کہ سلمان خان کا شمار بالی ووڈ کے ان اداکاروں میں ہوتا ہے جنہوں نے طویل کیریئر میں بے شمار ہٹ فلمیں دی ہیں، مگر آج تک شادی نہیں کی۔ ان کے مداح ہر بار اسی سوال کا جواب جاننے کے لیے بے تاب رہتے ہیں، اور اب اس تازہ بیان نے مداحوں میں ایک نئی بحث چھیڑ دی ہے۔